លោក សុង សោភ័ណ្ឌ បានចូលបម្រើការងារនៅធនាគារឯកទេស ដូនពេញ ម.ក ក្នុងតួនាទីជានាយកនាយកដ្ឋាននីតិកម្ម កាលពីខែមករា ឆ្នាំ២០២៦។

លោកមានបទពិសោធន៍ជាង ១៥ ឆ្នាំ ក្នុងវិស័យធនាគារ ការដោះស្រាយវិវាទ និងនីតិភូមិបាលនិងបេតិកភណ្ឌ។ មុនពេលចូលរួមជាមួយធនាគារឯកទេស ដូនពេញ ម.ក លោកធ្លាប់កាន់តំណែងជាប្រធាននាយកដ្ឋានដោះស្រាយវិវាទ នៅធនាគារពាណិជ្ជឈានមុខគេមួយក្នុងប្រទេសកម្ពុជា។ លោកចាប់ផ្តើមអាជីពដំបូងនៅឆ្នាំ២០១១ នៅគ្រឹះស្ថានមីក្រូហិរញ្ញវត្ថុទទួលប្រាក់បញ្ញើមួយ ដោយលោកបានវិវត្តខ្លួនពីមន្ត្រីច្បាប់ រហូតដល់តំណែងជាប្រធាននាយកដ្ឋានដោះស្រាយវិវាទ។ ក្នុងអំឡុងពេលប្រកបការងារ លោកបានសាងកេរ្តិ៍ឈ្មោះយ៉ាងរឹងមាំក្នុងការដោះស្រាយសំណុំរឿងធនាគារដ៏ស្មុគស្មាញ និងការកសាងភាពជាដៃគូយុទ្ធសាស្ត្រជាមួយអាជ្ញាធរតុលាការ។

ក្រៅពីតួនាទីនៅក្នុងធនាគារ លោកគឺជាមេធាវី និងជាសមាជិកនៃគណៈមេធាវីនៃព្រះរាជាណាចក្រកម្ពុជាផងដែរ។

លោកទទួលបានសញ្ញាបត្របរិញ្ញាបត្រជាន់ខ្ពស់វិជ្ជាជីវៈផ្នែកច្បាប់ ជំនាញនីតិភូមិបាលនិងបេតិកភណ្ឌ និងបរិញ្ញាបត្រច្បាប់ ពីសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច។ លោកក៏បានបញ្ចប់វគ្គបណ្តុះបណ្តាលវិជ្ជាជីវៈមេធាវីជាមួយគណៈមេធាវី និងទទួលបានវិញ្ញាបនបត្រជាច្រើនទៀតទាក់ទងនឹងការអនុវត្តច្បាប់ និងការដោះស្រាយវិវាទ។